Gítarkennslan fer fram í einkatímum sem eru 30 mínútur í senn tvisvar í viku. Yngri nemendur 6 til 8 ára eru tvisvar sinnum 20 mínútur. Byrjendur geta fengið leigð hljóðfæri hjá skólanum. Þegar nemendur eru komnir svolítið áleiðis í náminu eiga þeir kost á samspili. Skólinn býður einnig upp á rytmíska námsleið, þ.e. nám á rafmagnsgítar eða þjóðlagagítar sem er oft nefndur kassagítar.
Hér má lesa um námskrá, námsmat og áfangapróf.
| Heilt nám 2x 30 mín á viku (einkanám) |
| Heilt nám 1x 45 mín á viku og 40 mín samspil (einkanám og samkennsla) |
| 66% nám 2x 20 mín á viku (einkanám) |
| 66% nám 1x 30 mín á viku og 40 mín samspil (einkanám og samkennsla) |
| 50% nám 1x 30 mín á viku (einkanám) |
Francesco Rista er klassískur gítarleikari og tónskáld. Eftir að hafa lokið BA prófi á Ítalíu lauk hann meistaraprófi og einleikaraprófi við Konunglega danska tónlistarháskólann og öðru meistaraprófi við Lundarháskóla undir leiðsögn Göran Söllscher. Á ferli sínum hefur hann unnið með mörgum samtímatónskáldum og frumflutt verk, þar á meðal gítarkonsert Olivers Davis, ásamt tónverkum eftir Kevin Swierkosz-Lenart, Nick Martin, Finn Karlsson og fleiri. Umsagnir um upptökur hans hafa birst í mikilvægum tímaritum á borð við Psychedelic Baby og 15 Questions, auk þess sem plötum hans hefur verið útvarpað á BBC Music og Rai Radio 3. Eftir að hafa hljóðritað sína þriðju sólóplötu stofnaði hann sína eigin plötuútgáfu, Fresh Ribes, sem staðsett er á Íslandi og styður við og gefur út verk uppkomandi listamanna. Árið 2024 hlaut hann styrki frá De Sono Associazione per la Musica á Ítalíu og frá Konunglegu sænsku tónlistarakademíunni (Kungl. Musikaliska Akademien).
Þorgrímur er menntaður tónlistarmaður og upptökustjóri og hefur sérhæft sig á sviði sígildrar tónlistar og jazztónlistar. Hann lauk námi við tónmeistaradeild Tónlistarháskólans í Kaupmannahöfn sumarið 2020 en lauk áður prófi í skapandi tónlistarmiðlun frá Listaháskóla Íslands (2015) og burtfararprófi í jazzgítarleik frá Tónlistarskóla FÍH (2017). Síðustu ár hefur Þorgrímur starfað við upptökur samhlíða kennsku í gítarleik og hljóðvinnslu.
Spænski gítarleikarinn og tónskáldið Francisco Javier Jáuregui stundaði nám í klassískum gítarleik í Los Angeles og Madríd áður en hann útskrifaðist með meistaragráðu frá Guildhall School of Music and Drama í London. Javier hefur komið fram á tónleikum, bæði sem einleikari og flytjandi kammertónlistar víðs vegar í Evrópu, Bandaríkjunum, Afríku og Suðaustur-Asíu. Hann hefur flutt gítarkonserta eftir Vivaldi og Rodrigo og önnur verk með sinfóníuhljómsveitum og kemur reglulega fram með öðru tónlistarfólki. Javier hefur leikið inn á fjölmargar upptökur og geisladiska. Hann hefur kennt á gítar frá árinu 1997, m.a. í London og Madríd og flutt fyrirlestra við háskóla á Spáni og í Bandaríkjunum. Á árunum 2002-2019 tók hann þátt í árlegum tónlistarverkefnum í á annað hundrað skóla á vegum Wigmore Hall tónleikasalarins í London. Javier er einn stofnenda og stjórnenda Festival Internacional de Música de Navarra (FIMNa) á Spáni og Sönghátíðar í Hafnarborg.
