Námsmat

Eins og segir í aðalnámskrá er námsmat öll viðleitni til að leggja mat á árangur skólastarfs og hvernig tekist hefur að ná settum markmiðum. Megintilgangur námsmats er að örva nemendur, aðstoða þá við námið og örva til sjálfsmats. Mat þarf að vera óhlutdrægt, heiðarlegt og sanngjarnt. Meta þarf alla þætti námsins svo sem skilning, þekkingu, leikni og framfarir. Matið þarf að gefa glögga mynd af námi og kennslu í skólum landsins.

Leiðsagnarnám

Tónlistarnám skólans byggir á leiðsagnarnámi. Það felur í sér markmiðssetning í samtali og samvinnu milli nemenda og kennara um einstök verkefni sem taka tillit til hæfniviðmiða í aðalnámskrá. Vörður eru markaðar í náminu sem geta verið í formi verkefna, tónfunda,  tónleika eða prófa. Kennari og nemandi sammælast um hvernig markmiðum skal ná með skipulögðum heimaæfingum. Endurgjöf er veitt með reglulegum hætti af kennara, samnemendum eða foreldrum og ný markmið sett þegar öðrum hefur verið náð eða þegar þörf er á endurskoðun þeirra. Sjálfsmat er ekki síður mikilvægur liður í leiðsagnarmati og hvetur nemanda til að vera virkur og ábyrgur þátttakandi í eigin námi. Ný markmið byggja á leiðsagnarmati og endurgjöf jafnt sem áhugasviði nemanda. Nemendur fá skriflegt námsmat að minnsta kosti árlega að vori. 

Vörður í leiðsagnarnámi

• Tónfundir: Nemandatónfundir, tónfundir með leiðsögn annarra kennara, foreldratónfundir með þema, tónfundir í formi foreldraviðtals þar sem nemandi leikur fyrir foreldri eða tónfundur í tónmennt eða þverfaglegum kennslustundum í heimaskóla nemanda.
• Hljóð- eða myndupptökur: Nemandi gerir upptöku af leik sínum með reglubundnum hætti með hjálp foreldra, kennara eða samnemenda.
• Samleikur eða nýjar áskoranir: Nemandi tekur þátt í samleik eða tekst á við ný verkefni eða viðfangsefni sem eru út fyrir þægindarammann. 
• Tónleikar: Tónleikar geta farið fram innan sem utan skólans. Nemendur sem hafa hlotið nægilega þjálfun og hafa sjálftraust til, spila gjarnan utan skóla. Skólinn býður upp á fjölmörg tækifæri til að leika utan skólans sem innan. 
• Vorpróf: Nemendur þreyta vorpróf ýmist seint í mars eða maí. Á vorprófi leika nemendur ýmist tvö verk eða eitt verk og tónstiga. Einnig er hægt að þreyta tónleikapróf og fá þá nemendur endurgjöf fyrir flutning verks á tónleikum. Kennari prófar þá tónstiga í kennslustund. 
• Stigspróf: Nemendur þreyta gjarnan stigspróf áður en þeir þreyta áfangapróf. Nemendur byggja þá upp færni sína stig af stigi, læra smá saman fleiri tónstiga og hljóma og fá þjálfun í að halda nokkrum verkum í æfingu í senn. Prófdómarar eru kennarar innanhúss. Hér má sjá stigmagnandi prófkröfur í stigsprófum.
• Áfangapróf: Sjá nánar um áfangapróf hér.