Tónskólinn í Reykjavík hefur verið starfræktur frá 1991 og nýtur framlaga frá Reykjavíkurborg í gegnum þjónustusamning. Skólinn býður upp á fjölbreytt tónlistarnám, í formi hóp- eða einkatíma. Skólinn hefur alla tíð stuðst við aðalnámskrá tónlistarskóla og útskrifað fjölda nemenda á grunn-, mið- og framhaldsstigi. Kennsla fer fram í Grafarvogi í höfuðstöðvum skólans í Hverafold 5 en einnig í Grafarholti, Úlfarsárdal, Árbæ og Bústaðahverfi í sextán grunnskólum og tveimur kirkjum. Kennsla fer fram bæði á skóla- og frístundatíma. Kennt er á píanó, gítar, fiðlu, víólu, selló, þverflautu, söng og harmóníku. Nemendur 10 ára og eldri sækja jafnframt tónfræðigreinar. Starfræktar eru nokkrar hljómsveitir: strengjasveit, gítarsveitir og aðrar samsettar sveitir eða samspilshópar. Við skólann er starfræktur forskóli bæði í Grafarvogskirkju og Bústaðakirkju en flest forskólabörn sækja bæði kórtíma og hljóðfærasmiðju. Einnig er starfandi sönghópur fyrir unglinga. Forskólabörn og sönghópur mynda svo tvo kóra, Barna- og unglingakór Grafarvogs og Barnakór Fossvogs. Við skólann starfa 18 kennarar og árlegur nemendafjöldi er í kringum 270, þar af eru um 220 nemendur í einkanámi en aðrir sækja forskóla eða sönghóp. Skólinn er skipaður vel menntuðum og metnaðarfullum kennurum sem tileinka sér einstaklingsbundið leiðsagnarnám. Skólinn er í virku samstarfi við leik- og grunnskóla sem og aðra tónlistarskóla og tekur þátt í allskyns hátíðahöldum.
Meginmarkmið Tónskólans í Reykjavík er að veita vandaða tónlistarfræðslu, efla vitund og þekkingu ungmenna á tónlist, efla tónlistariðkun og tónlistarlíf. Markmiði skólans er framfylgt með:
Kennslu í sem flestum greinum tónlistar, eftir því sem aðstæður leyfa hverju sinni
Að greiða aðgengi sem flestra nemenda að tónlistarnámi með úrvali um kennslutíma og kennslustaði
Fjölbreyttu skilyrði nemenda til að þroska tónlistarhæfileika sína og tónlistarrýni, efla sjálfsmynd þeirra, sjálfstæði og sköpunargáfu
Stuðla að vellíðan, geðrækt og forvörnum
Áherslu á félagslegt gildi tónlistariðkunar með ýmiskonar samleik, samvinnu og samtali
Að veita nemendum tækifæri til að koma sem oftast fram, innan skólans sem utan
Að undirbúa nemendur undir áframhaldandi nám í tónlist til að verða ýmist virkir þátttakendur í tónlistarlífinu eða neytendur
Í aðalnámskrá segir að tónlistarskólar gegni fjölbreyttu hlutverki í samfélaginu. Þeim beri að stuðla að öflugu tónlistarlífi jafnframt því að vinna að aukinni hæfni, þekkingu og þroska einstaklingsins. Skólanum ber að taka tillit til mismunandi áhugasviða, getu og þroska nemenda sinna. Kennsluaðferðir og viðfangsefni þurfa því að vera fjölbreytt og sveigjanleiki í skólastarfi er nauðsynlegur.
Tónlistarskólinn var stofnaður 1991 af Sigríði Árnadóttur tónmenntakennara og skólastjóra skólans og Wilmu Young fiðlukennara. Wilma hélt úti öflugri þjóðlagasveit og fiðlunámi til fjölda ára en lét af störfum vegna veikinda og féll frá árið 2022. Sigríður Árnadóttir var skólastjóri og leiddi öflugt starf skólans frá upphafi fram til ársins 2023. Edda Austmann tók þá við skólastjórn.
Starf skólans hafði tekið miklum breytingum og skólinn teygt starfsemi sína út í fleiri hverfi en Grafarvoginn eins og Grafarholt, Úlfarsárdal, Háaleiti og Bústaði og Árbæ. Nafn skólans, Tónlistarskólinn í Grafarvogi, lýsti því ekki starfseminni nægilega vel og var misinngildandi fyrir nemendur. Þá var hugað að nafnabreytingu. Það sem sameinar alla nemendur sem sækja skólann er að þeir búa í Reykjavík enda byggir skólinn starf sitt á þjónustusamningi við Reykjavíkurborg. Edda Austmann, nýr skólastjóri, er fyrrum nemandi Söngskólans í Reykjavík og því vakti nafnið Tónskólinn í Reykjavík sterk tilfinningatengsl.
