Áfangapróf

Í aðalnámskrá fyrir tónlistarskóla frá árinu 2020 eru áfangaprófin kynnt. Náminu er skipt niður í grunnnám, miðnám og framhaldsnám. Grunnnám sýnir þá sambærilega getu og 3.  stig,  miðnám svipar 5. stigi og framhaldsnám 7. stigi. Áfangaprófunum er ætlað að tryggja ákveðna festu, aðhald og lágmarkskröfur í náminu. Sérþjálfaðir prófdómarar fara á milli skóla og dæma áfangaprófin. Sjá nánar profanefnd.is. 

Áfangaprófin eru örlítið frábrugðin fyrri stigaskiptingu. Stigin innan grunnnáms verða umfangsminni en fyrstu stigin í eldra kerfinu. Námstími verður eins og áður breytilegur og ræður þar mestu aldur og þroski nemandans. Í grunnnáminu er miðað við að nemandi sem byrjar 8 til 9 ára gamall geti lokið um það bil einu stigi á ári eða grunnprófi á 4-5 árum. Gera má ráð fyrir að eldri nemendur fari hraðar yfir. Í mið- og framhaldsnámi eykst umfang námsins og  lengist tíminn sem tekur að ljúka hverjum áfanga að sama skapi.

Menntamálaráðuneytið gefur út námskrár fyrir einstök hljóðfæri þar sem fram koma viðmiðunarverkefni fyrir áfangaprófin. Prófkröfur eru birtar undir hverju hljóðfæri á vef Stjórnarráðsins. Áfangaprófin eru flest tekin í maí en einhver í lok nóvember eða mars. Þegar nemandi lýkur áfangaprófi fær hann vitnisburðarblað sem birtist inn í skólaumsjónarkerfinu Speedadmin en prófskírteini eru send heim um leið og nemandi hefur lokið viðeigandi áfangaprófi í tónfræði.  

Grunnnám er víða metið sem val í grunnskólum. Miðnám er metið til eininga í flestum framhaldsskólum. Miðpróf fæst víða metið til 10 eininga í framhaldsskóla en framhaldspróf til allt að 20 eininga, háð námsbraut og skóla. Nú stendur yfir allsherjar endurskoðun á aðalnámskrá tónlistarskóla sem verður vonandi tekin til notkunar vorið 2025.